ROXAS CITY – Nagreklamo sa Bombo Radyo ang isa ka manunudlo sa Zapatos Island sa Masbate bangud sa ginaalegar pagpugong ni Punong Barangay Ronaldo Abenir sa pagsulod sang ila nga ginabakal nga ginalon sang tubig.
Ang tagreklamo amo si Ruby Legaspi, 39 anyos, isa ka manunudlo sa Zapatos Integrated School.
Suno kay Legaspi nga sang pag-abot na sang pumpboat nga may karga nga mga ginalon sang tubig, ginsugata sila ni Abenir kag ginapa-hold ang ila mga dala nga tubig bangud ginapangitaan pa sila sang quarantine pass.
Dugang pa sini nga alegasyon nga may mga ginpang-ula pa nga ginalon sang tubig ang kapitan kag may isa ka menor-de-edad nga napilasan sa angkla sang pumpboat bangud sa nangin aktwasyon sini.
Ginpahayag ni Legaspi nga sang una kag ikaduha ka beses nila nga pagpa-deliver sang ginalon sang tubig, wala man sang nangin problema bangud gin-ulayhon lamang ini sa pagsakay sang mga frontliners.
Sa ikatatlo nga kahigayunan sang pag-deliver, wala man napa-hold sang kapitan ang mga ginalon sang tubig bangud may nagsaway sa iya nga isa ka pulis.
Sa ikaapat na nga kahigayunan nga pagpa-deliver nila suno kay Legaspi, diri na siya ginmulay kag ginpunggan sang nasambit nga kapitan.
Gindugang pa ni Legaspi nga ang amo nga kapitan ang nagabaligya man sang tubig sa presyo nga P70 kada gallon.
Apang suno kay Legaspi, ginpakamaayo niya nga magpa-order sa ila mga kasimaryo sang tubig nga ginahatag sini sang P50 kada gallon bangud namahalan naman sila sa ginabaligya nga tubig sang amo nga kapitan.
