ROXAS CITY –Nagapanindugan ang punong barangay sang Dinginan, nga wala naglain ang iya buot nga wala sa iya gintugyan ang mga bugas nga ginapanagtag sang city government para mabuligan ang mga residente sang amo nga barangay kasunod sang ginapatuman nga enhanced community quarantine agud indi maglapta ang coronavirus diseas 2019.
Sa exclusive interview sang Bombo Radyo kay Kapitan Elizabeth Santiago, ginpahayag sini nga wala sang rason para magsunggod bangud para man ini sa mga pumuluyo.
Wala man nagapatimaan kun sa balay ni anay Kapitan Corros ginpahamtang ang bugas nga ipanagtag sa mga pumuluyo, magakadto diri ang kredito bangud klaro kag naintindihan sang mga pumuluyo nga gikan ini sa city government.
Apang ginpanindugan sini nga wala sang nangin problema sadto sang siya pa ang naga-supervise sa ginahatag nga bulig sang gobyerno bangud iya ginapasiguro nga patas ini sa tanan.
Ginkatingala man sini ang nagguwa nga balita angut sa pagkadula sang pangalan sang pila ka mga residente partikular ang ginasiling pamilya sang anay kapitan.
Kun tan-awon suno kay Santiago nga ang pangalan pa sang iya mga supporters ang nadula kag indi sang anay kapitan.
Ginapanindugan pa sini nga wala sila nagapangbuhin sa pangalan nga yara sa listahan sang mga BHWs.
Samtang handa si Santiago nga makig-atubang kay anay Kapitan Corros nga indi man iban sa iya bangud para sa iya nga tapos na ang pulitika kag dapat magbuligay na sila para sa kaayuhan sang mga pumuluyo sang Barangay Dinginan.
