ROXAS CITY – Nagsabat si Punong Barangay Danilo Santillan Sr. sang Barangay 10, Roxas City natuhoy sa pagkadakop sang ila barangay patrol nga may karga nga mga kahoy nga wala sang nagakaigo nga permit nga ginamaneho sang iya anak nga si Danilo Santillan Jr. sa banwa sang Pontevedra, Capiz.
Aminado ini nga siya mismo ang nagsugo sa iya bata nga magkuha sang kahoy bangud gamiton sa ila pagpakaayo sang payag sa banwa sang Panay.
Gin-ako sini nga nahangpan niya man nga sala ang pag-transport sang kahoy nga wala sang nagakaigo nga permit apang wala siya magdahom-dahom nga may nagapanakop bisan Dominggo nga adlaw.
Mahibaluan nga paglapas sa Presidential Decree No. 705 (Revised Forestry Code of the Philippines) ang panumbungon nga atubangon sang anak sang kapitan kag gin-impound man ang nasambit nga salakyan.
Aminado ang opisyal sa sala sini nga nahimo ilabi na ang paggamit sang ila patrol sa personal sini nga mga transaksiyon.
Nagpangayo man ini sang pasaylo sa mga pumuluyo sang ila barangay bangud sa pagka-impound sang amo nga salakyan.
