ROXAS CITY – Gindepensahan sang punong barangay sang Barangay Talon ang kaugalingon batuk sa ginaalegar pagpamalibad sini sa ginhatag nga manok sang CALs Poultry supply para sa mga pumuluyo sang nasambit nga barangay, bilang bulig sa ginapangatubang nga krisis sang bug-os nga kalibutan angut sa coronavirus disease (COVID-19).
Ginpahayag ni Kapitan Virgilio ‘’Yoyo’’ Santos nga wala sini ginbalibaran ang manok, apang sang nahibaluan nga tungaon sang duha ka balay ang isa ka manok, ginpalab-ot sini sa tagdumalahan sang CALs nga mapaiway na lamang subong nga semana kag tingubon na lamang sa masunod nga semana, agud tag isa ka bilog nga manok ang mabaton nga alokasyon sang kada household sa Barangay Talon.
Ginklaro pa sang opisyal nga indi mahimo nga iya balibaran ang grasya bangud ginahatag ini kag makabulig sa mga pumuluyo.
Apang sa karon, wala pa man nagutuman ang mga residente bangud nagahimud-us man sila sa barangay nga mabuligan ang ila mga constituents.
Ginpabugal man ni Santos ang nabaton nga bulig gikan sa pamilya sang pila ka mga pumuluyo sa Barangay Talon sa luwas sang pungsod sa diin indi lipod sa ila ang ginapatigayon nga 24 oras nga checkpoint sang mga frontliners sa ila boundary agud masiguro nga indi makasulod ang COVID-19.
Samtang nahibaluan nga wala pa nakabaton sang ayuda kasubong sang gift packs ang ila barangay gikan sa Roxas City govt.
Apang wala sila nagareklamo bangud posible nga masako pa ang syudad.
Kumporme man si Santos nga unahon sang City Government ang mga malayo nga kabaranggayan sang syudad nga mas nagakinahanglan.
Nakatigayon na nga makapanagtag sang mga food packs ang barangay sa ila mga constitutents bilang pauna nga bulig.
Nagbakal man sila sang 52 ka sako nga bugas nga ila ginkuha ang pondo sa calamity fund sang barangay sa diin makabaton sang duha ka gantang nga bugas ang kada pamilya.
