ROXAS CITY – Ginaduso sang provincial board nga temporaryo nga ipa-lockdown ang kapitolyo-probinsiyal agud mapaidalom sa pag-disinfect bilang tikang batuk sa balatian nga coronavirus disease (COVID-19).
Ini ang ginpahayag ni Board Member Jonathan Sonny Besa sang mainterview sang Bombo Radyo.
Suno kay Besa, ini ang kasunod sang ila nahibaluan nga nagpadulong pa sa kapitolyo si Provincial Administrator Edwin Monares sang nag-abot ini sa probinsiya gikan sa Manila kag wala man lang nagpaidalom sa quarantine.
Ginpahayag ni Besa magluwas sa pagpadulong sa kapitolyo, nagpadulong pa gid ang administrador sa isa ka hotel sa siyudad kun sa diin ginhiwat ang sinapol sang Provincial Development Council (PDC).
Wala ini nauyunan ni Besa kag sang iya mga kaupdanan sa konseho bangud suno diri nga bilang matag-as nga opisyal, sila dapat ang labing una nga mga indibidwal nga nagasunod sa mga mandatu kag pagsulundan nga nasaad sa ginpapanaog nga Executive Order sang ni Capiz Governor Esteban Evan ‘Nonoy’ Contreras.
Bangud man diri suno kay Besa, nagpahayag sila kay Vice-Governor Jaime ‘Mitang’ Magbanua, nga naga-home quarantine sa karon, nga hinyuon sa ila nga Sangguniang Panlalawigan (SP) Secretary nga sa Capiz Gymnasium sila magapatigayon sang sesyon.
Magadihon man sang isa ka resolusyon ang konseho nga nagaduso sa gobernador nga mapa-disinfect ang kapitolyo-probinsiyal kag ESLA governor’s mansion agud masiguro ang ikaayong lawas sang mga empleyado mangin sang mga nagasulod diri nga mga tawo.
