ROXAS CITY – Ginapaaligmat sang kapulisan kag ginapahugot ang seguridad sa tagsa ka pumuluyo matapos ang asud-asod nga insidente nga nagkalatabo sa syudad sang Roxas.
Sa interview sang Bombo Radyo kay PCol. Aron Palomo, hepe sang Roxas City PNP, ginsiling sini nga kinahanglan ang pagbuliganay kag pagbantay sa tagsa ka panimalay ukon negosyo bangud indi mapakot kun san-o maga-atake ang may malain nga tinutuyo.
Naghatag man ang hepe sang update sa pila ka insidente kapareho sang pagpangluthang sa Pavia St. kun sa diin may persons of interest na sila, padayon man nga ginalalip ang suspek sa pagpangawat sa bahin sang Teodoro Arcenas Trade Center (TATC) nga nakita sa CCTV.
Samtang sa insidente naman nga pagpang-abduct, ginpanginwala ini ni Palomo, suno sa ila inisyal nga imbestigasyon nasal-an lamang ang duwa ka babayi nga mga prostitute rason nga ginpaypay sang persona nga yara sa van.
Ginpahayag nga pasado na alas-11 sang gab-i natabo ang insidente kag wala man ang mga ini ginpilit sakay sa nasambit nga salakyan.
Kaangut diri, ginapanugyan ni Palomo sa mga ginikanan nga indi na pagpagwaon ang kabataan ilabi na ang kababainhan sa dis oras sang kagab-ihon kun indi malang importante.
Kun mahimo suno diri likawan man ang pagsuksok sang malip-ot nga pang-idalom nga panapton sa kababainhan bangud nagahatag ini temptasyon sa mga utok-kriminal ilabi na sa dis oras kag wala tawo nga lugar.
Pag-abot naman sa kinawatay, ginapahanumdom sang hepe sa mga negosyante nga hugton ang seguridad sang mga balaligyaan ilabi na subong nga nagaduging ang pagpangawat kun sa diin kalaban man sang ila nadadakpan lunsay menor de edad nga kun makaguwa nagabalik naman sa nasambit nga buluhaton.
Sa pihak sini, adlaw-adlaw man ang ila pagpatigayon sang police visibility, pagpatrolya kag pagpahamtang sang checkpoints sa bulig man sang Barangay officials nga nagabantay sa ila tagsa ka mga kabarangayan.
