ROXAS CITY – Wala naga-untat ang katapo sang Roxas City PNP sa pagpatigayon sang maid-id nga imbestigasyon may kaangtanan sa ginapahayag pagpang-scam sa isa ka senior citizen sa syudad sang Roxas.
Matandaan nga ginkilala ang biktima kay alyas “Roming”, 80-anyos kag residente sang Barangay Baybay, Roxas City.
Sa interview sang Bombo Radyo sa tagpamaba sang Roxas City PNP nga si PCMS Ramil Arcangeles, ginpahayag sini nga base sa biktima may yara sang nagtawag sa iya kag nagpakilala nga tiglawas sang isa ka bangko.
Suno pa sa biktima nga ginsiling sang wala pa makilan-an nga suspek nga pagataasan sini ang credit limit sang tigulang sa P700,000 nga una na nga yara lamang sa P500,000.
Nakuha ang masobra P280,000 sa Credit Card sang isa ka senior citizen matapos ma-scam sang nagpakilala nga representative sang isa ka bangko. Ginkilala ang biktima kay alyas “Roming”, 80-anyos nga residente sang Barangay Baybay, Roxas City.
Ginpahayag pa sini nga mahimo nga makakuha sang P3,500 nga voucher nagikan sa bangko ang biktima kabaylo sang iya one-time password (OTP).
Dugang pa nga gintug-anan man ang amu nga biktima nga iga-deliver na lamang ang bag-o sini nga credit card kay may credit limit nga P700,000 sadtng Enero 22 apang wala ini nag-abot.
Bangud sini, gilayon nga gin-report sang biktima sa bangko kag ginpahayag nga na-scam ang senior citizen sang kapin P235,170 nga gingamit sang scammer sa pagbakal sa isa ka appliance store sa Taguig City gamit ang OTP nga 222006 kag P48,444.00 nga gingamit naman sa pagbakal sa isa ka online store gamit ang OTP nga 999413.
Sa karon, nagahimo na sang pila ka mga tikang ang mga otoridad agud makakuha sang mga anggulo sa pagkakilanlan sang suspetsado.
