ROXAS CITY – Patay na sang masapwan ang isa ka kargador nga nagpaligo sa suba sa banwa sang Panit-an, Capiz.
Ginkilala ang biktima kay Leonardo Degoma, 50 anyos, residente sang Barangay Tabuc Sur, sa amo nga banwa.
Mahibaluan nga gikan sa merkado publiko sang banwa ang biktima kag nagpangarga sang nagpanaog ini sa pangpang kag nagpaligo sa suba.
Sa pagpangusisa sang Bombo Radyo Roxas nahibaluan nga madamo sang nangin kustomer sa pagpangarga si Degoma kag matapos ang trabaho nag-inom ini sang makahulubog nga ilimnon kag nagdesisyon nga magpaligo sa suba.
Apang nakibot ang mga tawo sa lugar sang wala na makabutwa ang biktima.
Suno kay Mr. Rosauro Del Castillo, Municipal Disaster Risk Reduction and Management Council (MDRRMO) Head sang Panit-an, gilayon sila nga nagresponde sa lugar matapos nga may nagpalab-ot sa ila sang impormasyon nga may nagpaligo sa suba nga wala makabutwa.
Didto kag nakit-an ang lawas sang biktima nga malapit lang man sa iya ginlusungan kag wala na sang kabuhi.
Posible suno kay Del Castillo, posible nga napiking ang biktima samtang nagasalom rason nga wala na ini makabutwa kag dalayon nga nalumos.
