ROXAS CITY – Ipasaka na sa korte ang kaso batuk kanday Sk Chairman Bacay, BPAT Member Bawisan, Bacalangco kag Gerarde nga amu ang may kahimuan sa pagkastigo kag pagbitay sang ido sa Brgy. Blasco, Pilar, Capiz.
Sa Resolution nga ginpaguha ni Associate Provincial Prosecutor Orola, nakitaan sang probable cause ang pagpatay sa ido sa Brgy. Blasco sang Mayo 8, 2024, pinaagi sa pag bitay kag pag kastigo sini.
Ginpahayag nga klaro nga pagbayolar sang Animal Welfare Act ang pagpatay sa amo nga ido.
Dugang pa nga nakitaan man ang nasambit nga mga persona sang conspiracy bangud isa lang ang ila malain nga tuyo.
Mahibaluan nga ang penalidad sang pagbayolar sang Animal Welfare Act ang nagalab-ot sang asta tatlo (3) ka tuig nga pagkapriso kag P250,000 nga multa kun ang mapamatud-an nga nakasala amu ang isa ka opisyal ukon empleyado sang gobyerno pareho kanday SK Chairman Bacay kag BPAT Member Bawisan nga tanod sang nasambit nga barangay.
Pahayag naman sang Capiz Animal Welfare Advocates Inc. nga tani mangin leksyon ang amo nga kaso sa mga pamuluyo kontra sa pagsakit sa mga kasapatan sa kun ano man nga pamaagi. Panugyan sini nga kun may nasuspetsahan ang mga pumuluyo nga ang sapat may rabies, magpakig-angut insigida sa mga otoridad.
via | Capiz Animal Welfare Advocates Inc.
