Gin-archive na sang Sandiganbayan 7th Division ang kaso sang graft batok sa resigned congressman kag fugitive nga si Elizaldy “Zaldy” Co.
Ginhimo ini nga tikang bangud masobra na sa anum ka bulan ang nagligad humalin sang nag-issue sang arrest warrant ang korte, apang nagapabilin nga wala sa kustodiya ang anay kongresista.
Una na nga ginbalik sang National Bureau of Investigation (NBI) ang warrant matapos wala makit-an si Co sa mga address nga natalana sa arrest warrant.
Gin-athag sang Integrated Bar of the Philippines (IBP) nga ang pag-archive sang kaso isa ka standard court procedure kag wala nagakahulugan nga ginbasura na ang kaso.
Sa pinakaulihi nga impormasyon sang gobyerno, ginapatihan nga yara sa France si Co, sa diin nag-apply siya sang asylum.
Samtang, ginpahayag naman ni Interior Secretary Jonvic Remulla nga gina-review pa sang gobyerno ang resolusyon sang Sandiganbayan.
