Magapangatubang sang sampaw-sampaw nga kaso ang suspek nga nagluthang-patay kay Police Captain Rian Ampoyos, anay pinuno sang 1st Capiz Mobile Force Company.
Matandaan nga natabo ang krimen sang Hulyo 20, 2026 sa isa ka KTV bar sa Brgy. Binuntucan, Pontevedra, Capiz.
Ang arestado amo si Leonil Deocampo, 28-anyos, residente sang Barangay Bungsuan, Dumarao, Capiz.
Sa interview sang Bombo Radyo kay Police Lieutenant Col. Francisco Paguia, hepe sang 1st Police Mobile Force Company, iya ginpahayag nga nagpadulong sila sa balay sang isa ka wanted person nga si Juvy Bagares sa Barangay Poblacion Ilawod, Pontevedra, Capiz agud iserbe ang warrant of arrest para sa iligal nga paghupot sang armas, apang wala ini sa iya panimalay.
Sang amo man nga tion, natyempuhan nga yara si Deocampo sa balay ni Bagares rason nga gin-aresto nila ini bangud sa warrant of arrest sa kaso nga murder with the use of unlicensed firearm.
Si Deocampo ang nag-ako nga siya ang nagluthang-patay kay Police Captain Ampoyos.
Ginpahayag naman ni Paguia nga nagtuyo pa kuntani nga magpalagyo si Deocampo, apang ila ini nga naaresto.
Sa subong, preso si Deocampo sa Pontevedra Municipal Police Station.
