ROXAS CITY, CAPIZ- Ginpakigbahin sang isa ka legal counsel ang isa ka kaso nga mahimo mapasaka sa korte batok sa isa ka tawo nga mahilig magpangyaguta.
Sa interview sang Bombo Radyo kay Atty. Patricia Dominique C. Yngcong sang Integrated Bar of the Philippines Capiz Chapter, iya ginpahayag nga mahimo mapasaka batok sa isa ka persona ang kaso nga unjust vexation kun sobrahan ini makapangyaguta sa isa man ka persona.
Ang Unjust Vexation, isa ka sahi sang pinamatasan sang tawo nga apisar wala ini nagatuga sang pisikal nga halit, nagatuga naman ini sang pagpangyaguta, kutaw-kutaw, kag pagka-irita sa isa ka inosente nga tawo. Sa mahupos nga istorya, mahimo nga makasuhan ang isa ka indibidwal sang unjust vexation kun siya ang mangin kabangdanan sang emotional distress sa iban.
Suno kay Atty. Yngcong, ang kasubong nga kaso may yara man sang penalidad kag pagka-preso. Apisar nga ‘arresto menor’ ini, mahimo nga mapamatbatan sang P500 tubtob P40,000 nga penalidad kun sa kwarta kag isa tubtob 30 ka adlaw naman nga pagka-preso ang tawo nga mapamatud-an nga nakakomiter sini.
Samtang, ginpakigbahin pagid sini ang cyber unjust vexation nga kun sa diin amo ini ang isa ka sahi sang pagpakigbahin sang mga malain nga tinaga batok sa isa ka tawo pamaagi sa internet ukon social media.
Dako naman ang penalidad para diri, sa diin pamaagi sa ‘arresto mayor’ nagalab-ot sa P1,000 tubtob P40,000 sa kwarta kag isa ka bulan kag isa ka-adlaw tubtob anom ka bulan kag anom ka-adlaw nga pagka-preso.
Pahayag niya, mahimo gid nga magdangop sa mga abogado ang mga biktima agud nga mahatagan sang aksyon ang kasubong nga kaso.
Nagpahanumdom naman ang natungdan sa publiko, nga antes maghulag ukon buhaton ang isa ka butang, panumdumon gid sang madalom agud malikawan ang kasubong nga kaso nga posible mapasaka batok sa ila.
Interviewed by Bombo Roadnie Daban Dalanon
