ROXAS CITY – Gin-athag sang Chairman sang Committee on Good Government and Human Rights sang Sangguniang Panlungsod nga maga-agi sa proseso ang administrative case nga ginpasaka batuk kay Punong Barangay Einstein Okpora sang Barangay Inzo Arnaldo, sining syudad.
Ginpahayag ni City Councilor Albert Gregory Potato nga matapos ang ila ginpatigayon nga preliminary conference nga gintambungan sang respondent nga si Okpora kag sang complainant, ginpasumiter na nila sang position papers ang magtimbang nga bahin kalakip ang affidavit sang mga witnesses kag documentary evidences.
Ginhatagan sang 15 diyas ang duha ka partido agud ila masumiter ang nasambit nga mga dokumento nga may daku nga papel sa himoon nga desisyon sang miyembro sang komite nga magaserbe nga councilor judges.
Suno pa kay Potato nga ila istudyuhan ang ginsumiter nga mga ebedensiya kag magapatigayon sila sang deliberasyon sa komite.
Ang madihon nga draft decision sang komite ang ila iga-sumiter sa konseho kag pagabotohan, kun aprubahan ukon indi.
Ginklaro man sang opisyal nga final and executory ang desisyon sang City Council, apang kun indi kumbinsido ang respondent sa desisyon, mahimo sila maka-appeal sa provincial board.
Yara na sa provincial board kun ila i-affirm ukon i-reverse and desisyon sang city council.
Samtang ginapanindugan ni Potato nga mangin objective ang desisyon sang konseho sang syudad kag mangin salandigan nila ang ebedensiya nga igasumiter sa ila .
