ROXAS CITY – Nagapati ang isa ka Capizeño criminal lawyer nga dapat i-reopen kag tun-an anay ang kaso nga kudeta kag sedisyon ni Senador Antonio Trillanes IV antes ang issuance sang warrant of arrest kag hold departure batuk sa senador.
Ini ang ginpahayag ni Atty. Nelson Borja sa interview sang Bombo Radyo kasunod sang pagdula ni Presidente Rodrigo Duterte sa ginhatag nga amnesty sang gobyerno sa senador sadtong tuig 2010.
Suno kay Borja, indi maathag ang estado sang kaso ni Trillanes kun ini ang na-dismissed ukon suspendido lamang.
Ini bangud kun matuod nga nadismissed ang nasambit nga kaso, indi na kinahanglan pa nga magpaguha sang hold departure order kag warrant of arrest batuk sa senador.
Bangud diri, posible suno sa iya nga magadangop ang kampo ni Trillanes sa Korte Suprema agud kwestiyunon ang validity sang nasambit nga proklamasyon.
Matandaan nga sa pagdetalye ni Department of Justice (DOJ) Secretary Menardo Guevarra sang kaundan sang Proclamation No. 572, ginadula na ang amnesty ni Trillanes para sa non-bailable offenses nga kudeta kag mutiny ukon sedition nga ginpasaka batuk sa iya.
