ROXAS CITY – Magasunod ang Roxas City Government sa mangin classification status sang probinsiya, matapos nabaton ang Executive Order No. 22 Series of 2021 sang gobernador nga nagapaidalum sa Capiz sa General Community Quarantine (GCQ).
Ginpahayag ni Mr. Ronald Amigo, City Assistant Department head nga karon nga yara sa GCQ ang Roxas City, istrikto sa gihapon nga ipatuman ang minimum health protocols, curfew kag limitado sa 30 porsyento ang kapasidad sang magasulod sa mga restaurants.
Nahibaluan nga magapabilin ang border checkpoint apisar nga yara sa GCQ ang quarantine status sang Roxas City kag probinsiya.
Aminado si Amigo nga nagnubo ang confirm cases sang COVID-19 matapos ginpaidalum sa Modified Enhanced Community Quarantine (MECQ) ang syudad.
Kun sadto nagalab-ot sa 45-55 daily cases ang nagpositibo sa COVID-19 sa syudad, nagnubo ini sa 21 daily case sang yara sa MECQ ang Roxas City.
Matood nga talalupangdon ang pagdowntrend sang COVID-19 cases, apang wala malab-ot ang ila target projection.
Pag-abot naman sa hospital utilization rate makabig nga high risk sa gihapon kag kinahanglan nga mapanubo ang kaso sang COVID-19 bangud indi na halos maka-akomodar sang mga covid patients ang mga ospital.
