ROXAS CITY -Nagsaka na sa 79 ang kabug-osan nga numero sang kaso sang Coronavirus Disease ukon COVID-19 sa probinsiya sang Capiz.
Sandig sa ginpaguwa nga case bulletin sang Capiz Provincial Health Office kahapon, Agosto 4, 2020 nakarekord ang talatapan sang isa ka panibag-o nga kaso sang nasambit nga balatian.
Isa ka 54-anyos nga Locally Stranded Individual ukon LSI nga lalaki ang nagpositibo sa COVID-19 nga residente sang banwa sang Jamindan kag may yara sang travel history sa Parañaque, Quezon City kag Metro Manila.
Sa nasambit nga numero, 50 diri ang ginakabig nga active cases, 27 ang nakarekober kag duha naman ang ginbawian sang kabuhi.
Mahibaluan nga nagapanguna sa gihapon sa may pinakamadamo nga kaso sang COVID-19 ang Roxas City nga naglab-ot na sa 19, Jamindan kag Tapaz nga may yara sang 9, Pontevedra nga may yara sang 8, President Roxas nga may yara sang 5, tig-4 naman sa banwa sang Maayon kag Mambusao, tig-3 naman sa Cuatero, Dumarao, Dumalag, kag Panitan, tig-2 naman sa Panay kag Sigma samtang isa naman sa Dao kag Ivisan.
Samtang, nagapabilin naman nga hilway sa COVID-19 ang banwa sang Sapian.
