ROXAS CITY – Nagdangat na sa 40 ang kaso sang COVID-19 sa probinsya kung sa diin 2 diri ang ginbawian sang kabuhi.
Sa pagpakig-angut sang Bombo Radyo kay Mr. Joeffry Espiritu, Public Information Officer sang Provincial Health Office- DOH ginpahayag sini nga padayon ang ila pagtutok kag pagbantay sa COVID-19 case bulletin.
Suno kay Espiritu nga base sa ila datos sumugod Enero tubtob Hunyo subong nga tuig sa nasambit nga numero sang kaso 2 diri ang ginbawian sang kabuhi kung sa diin nagapang-edaron sang 81-anyos nga babaye kag 69-anyos nga lalaki kag ginapahayag nga lunsay wala nakapabakuna kontra COVID-19.
Sa karun may yara na sang 9 active cases ang probinsya sa nasambit nga sakit kung sa diin ini ang nagikan sa banwa sang Dumarao, Maayon, Pilar, Sapian, Tapaz kag syudad sang Roxas kung sa diin kalabanan sa mga ini ang nakabatyag sang mild symptoms.
Ginapahayag man ni Espiritu nga sa tion ang isa ka pasyente may yara sang pila ka mga sintomas sang COVID-19, gilayon ini nga ginakuhaan sang specimen agud ipa-test sang mga doctor.
Sa pihak sini, wala naga-untat ang ahensya nga magpahanumdum sa publiko nga pananglitan may yara sang mga sintomas sang amu nga sakit nga ginabatyag gilayon nga magpadulong sa pinakamalapit nga health center ukon ospital agud madapatan kag matatap sang temprano.
Samtang, ginsiling ni Espiritu nga sa karun wala pa sang may naka-abot sa probinsya sang bakuna batuk sa nasambit nga sakit.
