ROXAS CITY-Liwat nga nadugangan ang kaso sang coronavirus disease ukon COVID-19 sa Roxas City.
Base sa official statement nga ginpaguwa ni Roxas City Mayor Ronnie Dadivas ginkompirmar sini, nga isa ka 75-anyos nga babaye nga residente sang Barangay Culajao sining siyudad ang nagpositibo sa nasambit nga balatian.
Gindala ini sa ospital bangod nabudlayan ini sa pagginhawa kag nakabatyag sang sintomas kapareho sang hilanat, ubo kag LBM, apang gilayon man ini nga ginbawian sang kabuhi.
Nahibaluan nga ginpaidalom ini sa RT-PCR test kun sa diin nagpositibo ang iya resulta.
Gindugang pa ni Dadivas nga wala sang history of travel ang nasambit nga pasyente apang may yara sang mga himata nga masami nga nagalakat sa guwa sang balay kag nagapadulong sa trabaho.
Magluwas diri, may yara man sang iban sini nga mga himata nga masami nagabisita sa iya.
Sa karon nagapadayon ang ginapatigayon nga contact tracing sang mga otoridad sa mga naka-close contact sa pasyente.
Sa karon naglab-ut na sa 87 ang kabug-osan nga kaso sang COVID-19 sa siyudad kun sa diin 31 diri ang active cases, 50 ang nag-ayo na sa balatian kag 6 ang ginbawian na sang kabuhi.
