ROXAS CITY – Ginapahayag nga nagalab-ot na sa 6.6 million ka mga indibidwal ang apektado sang coronavirus disease (COVID-19) sa United Kingdom suno sa isa ka symptom tracker.
Ini ang base sa report sa Bombo Radyo ni Bombo International Correspondent Reynand Dumala-on, tumandok sang Sigma, Capiz kag nagatrabaho bilang isa ka manunudlo sa Essex, England.
Suno kay Dumala-on, nabuyagyag ini pinaagi sang tracker questionnaire nga na-download sang mga Briton.
Mahibaluan nga ang COVID Symptom Tracker ang nahimo sang pila ka mga scientists sa King’s College Londo nga na-download sang masobra 650, 000 ka beses sa sulod lamang sang 24 oras humalin sang ini ang nalunsyar.
Ginagamit ini sang mga tawo sa ila tagsa ka mga balay ilabi na sang mga nakabatyag sang sintomas sang nasambit nga balatian.
Ginpahayag pa ni Dumala-on nga ang mga yara lamang sa ospital ang ginapaidalom sa testing sang mga health authorities sa UK.
Gintawag pa ni Dumala-on nga ‘survival of the fittest’ ang krisis nga ginapangatubang sa karon sang amo nga pungsod.
Wala naman suno diri halos sang may nagaguwa sa ila balay kag nagapamakal na lamang sila online sang ila mga nagapanguna nga mga kinahanglanon.
