ROXAS CITY – May yara sa karon sang 56 ka mga kaso sang balatian nga Dengue nga nabalhag sa probinsya sang Capiz.
Ini ang ginpahayag ni Mr. Joeffrey Espiritu, Development Management Oficer IV kag tagpamaba sang Department of Health (DOH)-Capiz, sang mainterview sang Bombo Radyo.
Suno kay Espiritu, sumugod sang Enero 1 tubtob Pebrero 4 sini nga tuig, nakabalhag na ang probinsya sang 56 ka mga nagbalatian nga nagikan sa lamok nga may dala nga Dengue.
May yara nalang sang tatlo ka mga banwa ang wala pa nakarekord sang balatian nga dengue, ini amu ang Dao, Maayon kag President Roxas.
Tapaz naman ang may pinakamadamo nga numero nga may kaso sang Dengue nga nagdangat sa 23, kun sa diin narekord man sa Brgy. Agpalali sa amu nga banwa ang clustering sang nasambit nga balatian.
Nabalhag man ang 2 months old nga bata bilang pinakabata nga pasyente sang Dengue kag 93-anyos naman ang pinakatigulang.
Dugang pa ni Espiritu nga ini nga numero ang mas mataas ikumparar sa 23 nga narekord sang nakaligad nga tuig sa kapareho nga tion, apang maayo nga balita bangud wala sang kaswalidad sang Dengue sa Capiz.
Pahanumdom pa sini nga ang pagpangitlog sang lamok nga may dala nga Dengue ang nakadepende sa lugar kag sitwasyon sang tubig, gani ipabilin ang matinlo nga palibot agud mapahilayo sa nasambit nga balatian.
