ROXAS CITY – Nagnubo sang 82 porsyento ang kaso sang dengue sa probinsiya sang Capiz kumpara sang nagligad nga tuig ba-se sa monitoring sang Department of Health (DOH)-Capiz.
Ini ang ginpahayag ni Mr. Joeffrey Espiritu, Development Management Officer IV kag tagpamaba sang DOH-Capiz sang mainterview sang Bombo Radyo.
Suno kay Espiritu nga humalin sang Enero 2020 may na-rekord lamang nga 203 ka mga kaso sang dengue ang probinsiya kumpara sang nagligad nga tuig sa amo nga period nga may recorded cases nga mil 167.
Pinakamadamo sa gihapon nga kaso sang dengue ang Roxas City nga may 72 samtang zero case naman ang banwa sang Jamindan.
Nagapati si Espiritu nga daku ang nabulig sa pagnubo sang dengue cases sa probinsiya ang pagtenir sang mga pumuluyo sa ila mga balay bangud sa COVID-19 sa diin may oras na para makapanglimpyo sang ila ugsaran.
Nahibaluan sa opisyal nga isa ka rason sa pagtaas sang kaso sang dengue ang pagduging sang lamok bangud sa mahigko nga palibot.
Samtang liwat ginganyat ni Espiritu ang mga pumuluyo nga i-practice ang 4S kag pangitaon kag gub-on ang breeding places sang lamok agud wala na sila sang mapangitlugan.
