ROXAS CITY – Nagtaas sa 980 porsyento ang kaso ng dengue sa probinsiya sang Capiz.
Ba-se sa pinakauli nga record sang Provincial Health Office kag Department of Health-Capiz humalin sang Enero 1 tobtob Hulyo 20, 2019, nagdangat na sa 3,673 ang kaso sang dengue kumpara sang nagligad nga tuig nga naglab-ot lamang sa 340 ka mga kaso.
Nagpanguna sa gihapon sa may pinakamadamo nga kaso sang dengue ang Roxas City na may 722, ginsundan sang banwa sang Dao nga may 374 nga kaso, 308 sa Pontevedra, 283 sa Tapaz, 272 sa Panay, 239 sa President Roxas, 231 sa Ivisan, 184 sa Mambusao, 165 sa Sigma, 151 sa Panit-an, 129 Dumalag, 126 Jamindan, 115 Sapian, 112 Maayon, 96 Cuartero, 86 Dumarao 79 sa Pilar.
Sa nasambit nga numero 16 na ang napatay bangud sa dengue, sa diin tuman nga apektado ang mga bata nga naga-edad sang 1 tobtob napulo ka tuig ang edad.
Samtang sa mga barangay sa Roxas City, nagpanguna ang Barangay Lawaan nga may 83 ka kaso ginsundan sang Barangay Bolo nga may 62 kag ang Barangay Milibli.
Matandaan nga gindeklara na ang dengue outbreak sa probinsiya bangud sa padayon nga pagtaas sang numero sang mga biktima sang amo nga sakit.
