ROXAS CITY – Nagnubo sang 3% ang kaso sang Dengue sa probinsya ikumparar sadtong tinalikdan nga tuig.
Ini ang ginpahayag ni Mr. Joeffrey Espiritu, Development Management Officer IV, sang Department of Health (DOH) Capiz, sang mainterview sang Bombo Radyo.
Suno kay Espiritu, may yara na sang kabug-usan nga 261 nga kaso sang Dengue ang probinsya sumugod sadtong bulan sang Enero tubtob subong nga Hunyo.
Sa nasambit nga numero, 3 diri ang nabalhag nga napatay, 27 ang bag-o nga kaso.
Mahibaluan nga ang banwa sang Tapaz ang may pinakamadamo nga kaso sa diin naglab-ot sa 78, ginasundan ini sang syudad sang Roxas nga may 47 nga kaso kag banwa sang Panay nga may 29 nga kaso.
Dugang pa ni Espiritu nga halos tanan nga banwa sang probinsya ang may yara na sang kaso sang Dengue.
Kalabanan suno diri nga apektado sang amu nga sakit ang mga kabataan.
Ba-se sa datos sang DOH-Capiz ang mga naga-edad 1 tubtob 10 ka tuig may yara sang 10 ka kaso, 1 tubtob 4 ka tuig may 47 nga kaso, 5 tubtob 9 tuig may 58, 10 tubtob 19-anyos may 72, 20 tubtob 29-anyos may 33, 30 tubtob 39, 40 tubtob 49, kag 50 tubtob 59 nga may lunsay tig 10 ka nga kaso, 60 tubtob 69 may 3 kag 70-anyos pataas may yara sang 8 ka kaso ang nabalhag.
Bangud sini, hugot nga ginapanugyanan sang ahensya ang mga ginikanan nga ipabilin ang katinlo sa palibot sang puluy-an subong man ang mga buluthuan sa diin kun kaisa diri nakukuha sang mga kabataan ang amu nga sakit.
Matandaan nga sadtong nakaligad nga semana may yara sang nabalhag nga napatay sa banwa sang Panay, bangud sa sakit nga Dengue.
Mensahe sini sa tanan nga sa tion may yara sang ginabatyag sa lawas ilabi na kun may hilanat, gilayon nga magpadulong ukon magpacheck-up sa doctor agud gilayon nga mahatagan sang nagakaigo nga pagbulong.
