ROXAS CITY – Naglab-ot na sa masobra 100 ang kaso sang balatian nga dengue ilabi na sang nagsugod ang pag-inulan sa pungsod.
Sa interview sang Bombo Radyo kay Mr. Joeffry Espiritu Public Information Officer sang Provincial Health Office- DOH, ginpahayag sini nga ang nasambit nga numero ang base sa ila datos sumugod Enero tubtob Hulyo subong nga tuig kun sa diin mas mataas ini kun ikumparar sang nagligad nga tuig sa kaangay nga tinion.
Suno kay Espiritu, ang bag-o nga kaso nga nabalhag sang nagligad nga semana naglab-ot sa 88 kun sa diin isa diri ang ginbawian sang kabuhi.
Mahibaluan nga ang syudad sang Roxas ang may pinakamado nga kasos ang nasambit nga balatian, ginsundan ini sang banwa sang Mambusao, kag Dumarao.
Ang Dengue isa ka sakit nga nagikan sa mikrobyo nga nagalaton sa isa ka indibidwal pinaagi sa kagat sang Aedes nga lamok.
Pila sa mga palatandaan sini amu ang mataas nga hilanat, paglingin sang ulo, pagpalanakit sang lawas kag pusug-pusugan, pagpalanakit sang mata, pagpalanuka, rashes sa panit kag iban.
Pananglitan suno kay Espiritu nga makabatyag sang mga sintomas gilayon nga magpakonsulta sa doktor ukon sa pinakamalapit nga sentro sa lugar.
Kun ang miyembro sang pamilya nga na-diagnose sang amu nga sakit, pasuksukan ini sang bayo nga mahaba ang manggas kag butangan sang muskitero agud malikawan nga makagat sang lamok kag indi na makatapon sa iban.
Kun ginahilanat, sibinan ang pasyente sang malamig nga tubig tubtob nga magtahaw ang init sa iya lawas.
Painumon sang madamo nga tubig agud ma-hydrate ang lawas kag pakaunon sang pagkaon nga puno sang nutrisyon, magamit man sang mosquito repellant bilang proteksyon kag ang katapusan pangitaon kag gub-on ang mga butang nga posible itlugan sang lamok kag natiniran sang kiti-kiti.
Mensahe sini sa pumuluyo nga ipabilin nga matinlo ang sulod kag guha sang panimalay kag himuon ang 4o clock habit.
