Nagnubo ang kaso sang dengue sa probinsya sang Capiz, humalin Enero tubtob Pebrero subong nga tuig.
Sa interview sang Bombo Radyo kay Mr. Joeffry Espiritu, Development Management Officer IV kag Information Officer sang Department of Health – Capiz, iya ginpahayag nga nakabalhag sang 112 ka mga kaso sang dengue humalin Enero tubtob Pebrero subong nga tuig, mas manubo sa kapin 64% kumpara sa 314 ka kaso sang nagligad nga tuig.
Suno kay Espiritu, nagnubo ang kaso bangud man sa pag-implementar sang stratehiya sa pagtapna sang dengue, labi na sa pagpangita sang mga butang nga ginatiniran sang lamok sa palibot.
Dugang pa ni Espiritu, padayon man ang pagpahanumdom kag pagbantay sang mga local government units sa mga pumuluyo agud man malikawan ang ini nga balatian.
Pahayag pa niya, nga kon may yara sang ginabatyag ukon sintomas sang Dengue gilayon nga magkadto sa ospital agud man mahatagan sang nagakaigo nga pagtatap kag pagbulong.
Nagpanawagan man ang natungdan nga magsunod sa mga pahanumdom kag panugyan sang mga opisyal agud nga mapabilin ang kahilwayan sang publiko sa nasambit nga balatian.
