ROXAS CITY, CAPIZ – Padayon nga nagadugang ang kaso sang dengue sa probinsya sang Capiz sandig sa data sang Provincial Health Office.
Sa 18th Morbidity Week, humalin Enero 1 tubtob Mayo 3, 2025, may yara sang 624 dengue cases ang probinsya sa diin nagtaas ini sang 55.61% kun ipaanggid sa 401 ka mga kaso nga narekord sang kaangay nga period sang 2024.
Nagapabilin naman sa isa ang patay bangud sa dengue.
May yara sang clustering sang dengue cases nga narekord sa Barangay Manibad, Mambusao.
Ang clustering ang nagatumod sa lugar sa diin may yara sang tatlo ukon masobra pa nga kaso sa apat ka asud-asud nga semana.
Sa age group, ang kadam-an sa mga apektado ang naga-edad 10 tubtob 19 anyos nga may 28.21%.
Nagapanguna sa may pinakamadamo nga kaso sang dengue ang Roxas City nga may 204 sa diin nagsaka ini sang 53.38% kun ipaanggid sa 133 ka mga kaso nga narekord sang nagligad nga tuig.
Liwat nga nagapahanumdom ang Capiz Provincial Health Office sa publiko nga sundon ang 4-S Strategy.
