Nagnubo ang kaso sang dengue sa Roxas City subong nga bulan kon ipaanggid sa pareho nga bulan sang nakaligad nga tuig.
Sa interview sang Bombo Radyo kay Dr. Lori Cahilog, Roxas City Health Officer, iya ginpahayag nga may ara sang 209 ka kaso sang dengue nga na-record subong nga bulan. Ini mas nubo kon ipaanggid sa pareho nga bulan sang nakaligad nga tuig. May duha man ka tawo nga napatay bangod sa dengue.
Suno pa kay Dr. Cahilog, may mga programa ang City Health Office sa mga barangay agud mapunggan ang pagsaka sang kaso sang dengue. Lakip diri ang simultaneous nga clean-up drive sa mga barangay agud matapna ang mga lugar nga mahimo pamugaran sang lamok.
Ginpahayag man niya nga importante ang pagmaintan sang kalimpyo sa palibot kag pagsiguro nga wala sang mga lugar nga mahimo istaran kag itlogan sang lamok.
Sa karon, ginapangabay sang City Health Office nga ang publiko nga mangin alerto kag pirmi magkuha sang impormasyon parte sa dengue agud malikawan ang paglapta sang sini nga sakit kag maprotektahan ang tagsa ka pamilya.
