Nagnubo ang mga kaso sang influenza-like illnesses (ILI) sa first half sang Nobyembre sa pihak sang paglamig sang panahon.
Base sa pinakabag-o nga datos sang Department of Health (DOH), nagaguha nga ang ILI cases sa bilog nga pungsod nagnubo nagikan sa 7,971 sadtong Oktubre 20 tubtob Nobyembre 2 sa 7,571 cases sadtong Nobyembre 3 tubtob 16.
Naobserbahan man ang pagnubo sang gin-igo sang sakit nagikan Nobyembre 17 tubtob 30 nga may 3,710 cases apang ginsiling sang DOH nga mahimo pa ini nga magbag-o bangud sa ulihi nga pag-update kag pagpakonsulta.
Sa kabug-usan, nagnubo man ang ILI cases nagikan sa Enero tubtob Nobyembre 30 kung sa diin yara sa 165,992 cases, mas manubo ini sang 17% kung ikumparar sa masobra 200,000 cases nga napagkit sa kaangay nga panahon sadtong 2023.
Sa pihak sang kabug-usan nga pagnubo sang kaso, nakapagkit sang pagtaas sa pila ka rehiyon kaangay sang Cordillera Administrative Region (CAR), Bicol Region, Central Visayas, Zamboanga Peninsula, Northern Mindanao, kag Bangsamoro Autonomous Region in Muslim Mindanao (BARMM).
Kaangut sini, ginganyat ni Health Sec. Ted Herbosa ang publiko nga magsuksok sang intsakto sang face mask, obserbahan ang instakto nga pag-ubo kaangay sang pagtabon sang baba, kag magpabilin na lamang sa puluy-an sa tion nga makabatyag ang sintomas sang sakit.
Ginpanugyanan man sini ang mga pamilya nga magpabakuna sang anti-flu agud maproteksyunan ang kaugalingon batuk sa ILIs.
Suno diri, posible nga magtaas ang mga kaso sang respiratory infections kaangay sang ubo kag sip-on mangin ang COVID-19 dala sang mas malamig nga tyempo kadungan sang Amihan season.
Matandaan una na nga gin-anunsiyo sang State Weather Bureau sadtong Nobyembre nga maka-eksperyensya sang mas malamig nga panahon sa palaabuton nga mga binulan.
