CAPIZ – Naglab-ot na sa duha ang kaso sang firework related injury partikular ang nalukpan sang boga.
Sa interview sang Bombo Radyo sa DOH Capiz Information Officer nga si Mr. Joefry Espiritu, ginpahayag sini nga ang nagdugang nga kaso isa ka 6 ka tuig nga bata nga lalaki nga nagikan sa banwa sang Pilar.
Suno kay Espiritu, nag-angkon sang pilas sa tuo nga bahin sang mata ang biktima nga gilayon naman ginpadangat sa pinakamalapit nga ospital para sa nagakaigo nga pagbulong.
Matandaan una nga nakapagkit ang ahensya sang kaso nagikan sa banwa sang Dumarao.
Sa nasambit nga kaso, mas manubo ini suno kay Espiritu sang 60% kung ikumparar sadtong tinalikdan nga tuig kung sa diin nakapagkit sila sang 19 tanan ka mga kaso sa kaparehas nga panahon.
Panugyan sang Information Officer pananglitan mabiktima sang palupok, gilayon nga hugasan sang sabon kag matinlo nga running water ang pilas kag takpan sag matinlo nga tela kag dal-on sa pinakamalapit nga ospital.
Nagahinyo man ini sang kooperasyon sa publiko ilabi na sa pagsug-alaw sang Bag-ong Tuig.
