ROXAS CITY – Nagnubo ang numero sang mga matawag prevalent cases sang pagpang-abuso sa mga kababainhan sa probinsya, sa subong nga tuig, ikumparar sang una nga tatlo ka bulan sang tuig 2021.
Ini ang ginpahayag ni PMaj. Ruby Magallanes, public information officer sang Capiz Police Provincial Office, sang mainterview sang Bombo Radyo.
Suno diri, ba-se sa numero sang nagligad nga Enero tubtob Marso tuig 2021, may yara sang 42 ka mga nabalhag nga kaso angut sa nagkalain-lain nga pagpang-abuso sa kababainhan, apang sa karon nga tuig sa kapareho nga binulan, may yara gid lamang sang 18 ka mga reported cases sa kaangay nga kaso.
Ini pamatuod lamang nga positibo ang ginahimo nga tikang sang Provincial Women and Children Protection Desk (PWCPD).
Ginatumod nga rason sa pagnubo, bangud sa pagmandu sa mga WCPD chiefs sa mga Police Station sa probinsya nga engganyuhon nga pasakaan sang kaso ang suspek sa reklamo nga pagpang-abuso agud masampulan kag mahadlok nga magliwat pa; pagpasangkad sang kampanya batuk sa pag-abuso kun sa diin gina-imbitahan ang mga kalalakinhan sa isa ka pagsinapol agud ipahibalo ang mangin konsekwensiya sa pag-sakit sang babayi; kag pagpahamtang sang WCPD unit sa RMPH.
Panugyan sang tagpamaba sang Capiz PPO sa mga kababainhan nga mag-angkon sang tingog kag indi magkahadlok nga magreport sa tion sang pagpang-abuso pisikal ukon emusyonal.
