Nagbuylog ang Presidential Task Force on Media Security (PTFOMS) sa bug-os nga media community sa pagpangasubo sa kamatayon ni Juan “Johnny” Dayang, 89 anyos, matapos nga ini ang gintiro-patay sa sulod sang iya puluy-an sa Villa Salvacion, Barangay Andagao, Kalibo, Aklan sang Abril 29, 2025.
Nagbyahe padulong sa Kalibo si PTFOMS Undersecretary Joe Torres kag personal nga nagkadto sa balay ni Dayang agud hibaluon ang brutal nga pagpatay sa seasoned journalist nga ginakabig nga haligi sang Aklan Press Club.
Suno kay Torres, ginpalab-ot na sa Palasyo sang Malacañang ang insidente kun sa diin hugot nga ginmando ni Presidente Ferdinand Marcos Jr. nga maid-id nga imbestigaran kag tutukan ang amo nga insidente bangud indi ini ang una nga kahigayunan nga may napatay nga katapo sang media.
Ginpahayag sini nga nagapakig-angut na siya sa Special Investigation Task Group (SITG) agud mahibaluan ang mga tikang sang kapulisan sa nagapadayon nga imbestigasyon.
Ginsiling sini nga hugot nga ginabantayan sang PTFOMS ang mga nagakatabo kag nagalaum nga mahatagan sang hustisya sa madali nga panahon ang kamatayon sang Chairman Emeritus sang Publishers Association of the Philippines (PAPI).
Kaangot sini, ginpahanumdom ni Torres ang tanan nga media personnel nga doble ang paghalong bangud ang kamatuoran lamang ang ginapresentar sa print ukon broadcast media.
