ROXAS CITY, CAPIZ- Nagdagat na sa 25 ka mga kaso sang sunog ang nabalhag sang Roxas City Fire Station sa syudad sang Roxas, Capiz umpisa sang Enero tubtob Hulyo 14, 2025.
Sa interview sang Bombo Radyo kay Senior Fire Officer 1 Junemar D Galve, Chief sang Public Information Unit of Roxas City Fire Station, iya ginpahayag nga sa 25 ka fire incident nga nabalhag sa nasambit nga mga binulan, 18 diri ang structural, lima (5) ang residential, lima (5) ang non residential kag lima (5) sa transportasyon.
Dugang pa sini nga base sa ila nga monitoring, manubo ang kaso sang sunog sa subong nga tuig sa pareho nga mga binulan sang tinalikdan nga tuig 2024.
Nahibaluan nga nagdangat sa P613, 997 ang kabilugan nga balor sang halit nga ginbilin sang amo nga mga serye sang sunog sa syudad.
Pahayag pa ni Galve, nga ang masami nga rason sang sunog amo ang electrical in nature ukon sa koneksyon sang kuryente kag ginasundan sang napabay-an nga ginaluto sa tagsa ka mga abohan.
Samtang, panugyan sini sa mga pumuluyo nga pirmi nga pasiguruhon ang seguridad ilabi na kun bayaan ang puluy-an. Siguraduhon nga wala na sang baga ukon kalayo sa dapog kag napangbugnot ang tanan nga mga nakapangsaksak nga kagamitan antes nga maglakat.
With a report from Bombo Jessa Mae De Los Santos
