DAO CAPIZ – Padayon ang pagpatigayon sang maid-id nga imbestigasyon sang katapo sang Dao Municipal Police Station sa nagluntad nga paghit and run sa isa ka lalaki sa Barangay Manhoy, Dao Capiz.
Matandaan nga nag-angkon sang patal nga pilas sa ulo ang biktima nga ginkilala kay alyas “Rene”, 30-anyos kag residente ang Sitio Ilaya, Barangay Quinayuya, sa amu nga banwa.
Sa interview sang Bombo Radyo sa OIC sang Dao MPS nga si PCpt. Rian Ampoyos, ginpahayag sini nga isa sa ila ginahimo agud makakuha sang anggulo ang paglantaw sa Closed-circuit television (CCTV) footage nga malapit sa lugar agud matumod kung anu nga klase sang salakyan ang nakabunggo sa biktima.
Suno kay PCpt. Ampoyos, natabo ang insidente samtang nagatabok ang biktima sa dalan kag hinali lamang nga nabungguan ini sang nagapadulong nga salakyan.
Gilayon man suno diri nga ginrespondihan ang biktima agud hatagan sang pauna nga pagbulong antes ginpadangat sa Dao District Hospital apang gindeklarar ini nga dead on arrival sang doctor.
Ginpahayag man sini nga matapos ang insidente, madasig nga nagpalagyo ang wala pa makilan-an nga suspek padulong sa direksyon sa probinsya sang Iloilo.
Sa karun, ginahulat na lamang nila ang resulta sang post mortem examination sa bangkay sang nasambit nga biktima.
