ROXAS CITY – Nagapatigayon sang hugot nga inspeksyon ang gintingub nga puwersa sang mga kapulisan sang Roxas City PNP, Highway Patrol Group, Criminal Investigation ang Detection Group ukon CIDG, Capiz Provincial Crime Laboratory kag Capiz Police Provincial Office subongman ang City Licensing Office sang city government sa mga junkshop kag motorcycle and repair shop sang mga salakyan nga naga-operate sa siyudad sang Roxas.
Ini may kaangtanan sa madata nga kaso sang motornapping nga narekord diri sa siyudad kag probinsya sang Capiz.
Sa interview sang Bombo Radyo Roxas kay Lt. Col. Ricardo Jomuad Jr., hepe sang Roxas City Police Station, ginpahayag sini nga ginkasa ang nasambit nga inspeksyon agud matumod ang mga motorcycle kag repaire shop nga naga-operate kun bala nagabaligya kag nagabakal ini sang kinawatan nga mga motorsiklo.
Ginatsekyar man sang mga katapo sang mga kapulisan ang plaka sang mga motorsiklo pinaagi sa ila nga database.
Ang nasambit nga lihok ang ginpangunahan ni Police Captain Peter Osit Bergonio, Provincial Officer sang Capiz Highway Patrol Group.
Ginpahayag naman ni Police Staff Sergeant Henry Tolentino nga ginainspeksyon man nila ang mga motor parts nga ginabaligya sang nasambit nga mga shop.
Magluwas diri, ginapangitaan man ini sang license permit sang City Licensing Office kun legal ang operasyon kag kun may yara sang business permit ang nasambit nga mga shop.
