Katapo sang militar, ginpasalig nga pagatutukan ang natabo nga pagpangsunog sang CPP-NPA sa banwa sang Dumalag

BOMBO ROXAS – Nagpasalig ang tagpamaba sang 3^rd Infantry Division sang Philippine Army nga pagatutukan sang mga katapo sang militar ang natabo nga pagpangsunog sang ginapatihan 15 ka mga myembro sang Communist Party of the Philippines – New Peoples Army sa bodega sang poultry farm ni Capiz 2^nd District Congresswoman Fredenil “Oto” Castro sa Barangay San Agustin, Dumalag, Capiz.

Ini ang ginpahayag ni Major Cenon Pancito III sang mainterview sang Bombo Radyo Roxas.

Suno kay Pancito nga nagpadala na sang dugang nga pwersa sang militar sa nasambit nga lugar agud hibaluon ang dugang ang impormasyon.

Dugang pa ni Pancito nga ginatun-an sa karon sang mga militar ang motibo sang pagpangsunog sang nagpakilala nga mga myembro sang rebelde nga grupo.

Nagapati man ini nga kabahin lamang ini sang stratehiya sang NPA agud mabalhin ang atensyon sang mga pumuluyo sa iban nga bagay.