ROXAS CITY – Padayon sa karon nga ginahibalo sang mga katapo sang militar ang mga miyembro sang New People’s Army ukon NPA nga nagpatigayon sang kalakasan sa Barangay Roosevelt, Tapaz, Capiz.
Nahibaluan nga nagdugay sang duha ka minutos ang pagbayluhanay sang mga lupok sang armas luthang sa nagluntad nga engkwentro sa tunga sang Philippine Army kag NPA.
Suno kay Major Cenon Pancito III, tagpamaba sang 3rd Infantry Division sang Philippine Army nga may mga naka-base nga mga katapo sang militar sa nasambit nga barangay kadungan sa ginapatigayon nga Community Support Program (CSP).
Dugang pa ni Pancito nga yara sa 100 tubtob 150 metros ang kalayuon sang mga rebelde nga grupo rason nga nagbalos sang lupok ang mga militar agud sa pagdepensa.
Narekober naman sa lugar ang 14 kabilog nga 5.56mm empty shell, isa ka 40mm nga granada nga wala pa naglupok, isa ka empty shell sang 7.62mm nga ammunition ukon bala kag 70 meters nga electrical wire.
Ginapahayag nga posible taktika lamang ini sang mga rebelde nga grupo agud ilikaw ang paminsaron sang mga militar bangud sa natabo man nga engkwentro sa banwa sang Janiuay, Iloilo.
Wala man sang may narekord nga napilasan sa hanay sang mga militar kag mga pumuluyo apang may mga igo sang bala ang pila ka parte sang covered gym sang nasambit nga barangay, mga kahoy sa palibot kag poste sang kuryente.
