ROXAS CITY – Wala na sang kabuhi sang nasapwan ang isa ka 27-anyos nga katapo sang Philippine Air Force matapos ginaalegar ginluthang patay ang kaugalingon sa sulod sang ila barracks sa Tarlac City.
Nahibaluan nga nakabati na lamang sang lupok ang iya mga kaupdanan rason nga madasig nila ini ginpadulongan kag ginstekyar ang lugar sa diin nasapwan na lamang nila nga duguon kag wala na sang kabuhi ang wala na ginhingadlan nga biktima.
Ginapahayag nga may yara sang ginasuprehir nga problema ang biktima rason nga ginluthang patay sini ang kaugalingon nga gintunaan naman sang iya kamatayon sadtong Hulyo 16, 2020.
Sa exclusive interview sang Bombo Radyo Roxas kay Emy Bellosillo residente sang isa ka barangay sa banwa sang Panay kag iloy sang wala na ginhingadlan nga biktima nga nakibot na lamang ini sang nabalitaan nila nga patay na ang iya anak.
Suno kay Bellosillo nga tubtob subong halos indi ini makapati nga mahimo ini sang iya hinipo nga anak nga utason ang kaugalingon nga kabuhi.
Magluwas diri, blanko pa ang ila paminsaron kun ano ang madalom nga rason nga nagtulod sa iya himata nga magpanginmatay.
Ginpahayag pa ni Bellosillo nga tuman ka mapinalanggaon kag mabuot man ang iya anak kag wala man nakasugid sa iya ang biktima nga may yara ini sang mabug-at nga problema.
Apang, antes natabo ang insidente may gintuad pa ang biktima sa iya magulang nga nagaproblema ini sa iya nobya nga miyemro man sang Philippine Air Force apang na-assign sa iban nga lugar.
Nahibaluan nga nagtawag pa ang biktima sa iya magulang kag nagpangayo sang 150 nga regular load nga kasubong nagapamilin-bilin naman sa iya mga himata.
Sa karon, ginpaidalom na sa autopsy examination ang bangkay sang biktima kag ginahulat na lamang nila ang resulta.
Ginpahayag naman ni Bellosillo nga indi na lamang diri pagdal-on puli ang bangkay sang biktima bangud mas ginpakamaayo na lamang nila nga magpamilya nga ihaya na lamang ini sa balay sang iya magulang sa Taguig City.
Sa oras nga mag-abot na ang bangkay sang biktima sa balay sang iya utod, natalana naman nga sugaton sang C130 nga military aircraft sang Philippine Air Force ang iya iloy sa probinsya sang Capiz.
Samtang, natalana naman nga igalubong ang bangkay sang biktima sa Libingan ng mga Bayani.
