ROXAS CITY – Naka-rekober na ang halos katunga sang narekord nga kaso sang coronavirus disease (COVID-19) sa Israel.
Ini ang base sa report sa Bombo Radyo ni Bombo International Correspondent Adelfa Rodriguez Amar, tumandok sang San Lorenzo, Guimaras kag nakaba-se karon sa Herzliya, Israel.
Ginpahayag sini nga base sa pinakaulihi nga datos sang Ministry of Health, naglab-ot na sa 7, 746 ka mga pasyente ang naka-rekober sa kabug-usan nga 15, 728 nga narekord nga kaso sang nasambit nga balatian pungsod.
May masobra sa 7, 000 pa ang padayon nga nagapaayo sa ospital kag ginatutukan sang mga health authorities.
Narekord naman ang 210 ka mga COVID-19 deaths sa nasambit nga pungsod.
Bangud sa madasig nga pagsaka sang recoveries, amat-amat na nga nagabalik sa normal ang sitwasyon sa pungsod.
Natalana man nga magbalik sa operasyon ang mga eskwelahan sa pungsod.
Amat-amat naman nga nagabukas ang mga establisyemento apang nakahanda sa gihapon ang gobyerno sang Israel nga magpatuman liwat sang strikto nga quarantine protocols pananglitan may pagsaka sang kaso sang amo nga balatian.
