ROXAS CITY – Lauman nga sa masunod nga bulan sang Setyembre mangin operational na ang kaugalingon nga relocatable containerized real-time polymerase chain reaction (RT-PCR) testing laboratory sang gobyerno sang siyudad.
Ini ang ginpahayag ni Roxas City Mayor Ronnie Dadivas sang mainterview sang Bombo Radyo.
Suno kay Dadivas nga posible sa katapusan nga bulan sang Agosto magaabot na ang nasambit nga equipment.
Ginpahayag sini nga may schedule naman para sa trainings ukon paghanas sang iga-hire sang gobyerno nga mga medical technologists, pathologists, nurses kag iban pa nga laboratory staff.
Kun mag-abot na ang nasambit nga laboratoryo, gilayon ini nga pagatestingan subong man maga-dry run ang mga personnel para sa assessment kag accreditation sang Department of Health (DOH).
Ginahitsu naman ang staff house nga pagateniran sang mga personnel sang nasambit nga laboratoryo.
Mahibaluan nga ini ang ginapanan-aw ni Dadivas nga pamaagi agud ma-contain ang coronavirus disease (COVID-19) samtang wala pa sang bakuna kontra sa amo nga balatian.
Pinaagi sini mahimo nga ma-test, ma-trace kag ma-treat ang mga posible malatnan sang nasambit nga balatian.
Matandaan nga una na nga nagpakigsapol ang alkalde sa Capiz Medical Society, Hospital Administrators, Association of Medical Technologists, Philippine Red Cross kag iban pa nga stakeholders natuhoy sa nasambit nga plano.
