ROXAS CITY– Ginakahangaw-an ni anay Bayan Muna Partylist Representative Neri Colmenares ang delikado nga sarang matuga sang ginaduso nga pag-amyendar sa 1987 Philippine Constitution.
Sa interview sang Bombo Radyo Roxas kay Colmenares nga subong kabahin sang Anti-Chacha Coalition, ginpahayag sini nga makaangkon lamang sang term extension ang mga senador, kongresista kag mga lokal nga opisyal sa idalom sang proposed ammendments sang Duterte administration.
Suno pa sa iya nga posible stratehiya sang administrasyon nga palawigon ang termino sang mga mamalidha agud masiguro ang ila suporta sa patigayunon nga Charter Change.
Magluwas diri, ginakahangaw-an man ni Colmenares nga mahatagan sang oversight power si Presidente Rodrigo Duterte agud imbestigahan ang mga opisyal sang gobyerno kalakip na ang mga yara sa constitutional commissions kag independent bodies.
Nagpabutiyag pa ini nga wala siya nagapamalabag sa Charter Change apang wala niya mauyunan ang ginaduso angot diri bangud magahatag lamang ini sang tuman nga gahom sa presidente.
Samtang, bilang tikang sang koalisyon, magalibot sila sa magkatugay nga siyudad para ipalapnag sa publiko ang ginapahayag niya malain nga kaundan sang nasambit nga hagna.
