Aminado si Capiz 1st District Congressman Emmanuel Billones Sr., nga may pila ka mga bagay nga ila ginalauman ang wala malakip sa nangin kaundan sang katapusan nga State of the Nation Address ukon SONA ni President Rodrigo Duterte kahapon.
Ginpahayag sang kongresista nga indi man klaro kag kasubong bitin ang nangin mensahe sang presidente, kun ano ang dapat lauman sang pumuluyong filipinhon sa nabilin nga mga binulan nga pagpungko ni President Rodrigo Duterte sa pwesto.
Ang klaro lamang sa kaundan sang SONA ni Duterte amo ang war on drugs campaign sang administrasyon.
Gani kun si Congressman Billones ang pahatagon sang grado sa kabug-usan nga SONA sang presidente, ginahatagan niya ini sang grado nga syete.
Ginkumpirma man sang opisyal nga isa man sa ginalauman mabatian sang kadam-an kahapon amo ang pulitika kag kun ano na ang matabo sa Partido PDP-Laban nga karon natunga na sa duha ka paksyon.
Ginabantayan man ang pagbuhi sang makahas nga mga tinaga ni President Duterte sa pila ka mga indibidwal nga may nahimo nga indi maayo, apang natapos lamang ang SONA wala gid sang ginhinambit kag ginpakamalaut nga tawo ang chief executive officer.
Apang indi pabor si Congressman Billones sa ginbuy-an nga pahayag ni President Duterte ang pamaagi agud matapna ang korupsyon amo ang pagpaidalum sa martial law.
Suno diri nga indi sabat ang martial law bangud gina-abuso sini ang tawhanon ga kinamatarung sang mga pumuluyo.
