ROXAS CITY – Ginakabig nga ikaduha na nga kabuhi sang isa ka kaupdanan sang mga biktima nga nakasakay sa ikaduha nga bangka ang pagkahilway sini sa pagkalumos, matapos nga wala makasakay sa una nga bangka nga naglugdang sa Laguna de Bay sa banwa sang Binangonan, Rizal.
Sa exclusive interview sang Bombo Radyo kay Lorenzo Ituriaga sang Dumarao, Capiz, ginpahayag sini nga kaupod kuntani siya sa una nga bangka nga ginsakyan sang mga biktima apang bangud may ginbakal pa, sa ikaduha nga bangka na ini nakasakay.
Suno kay Ituriaga, nga nakit-an sang mga ini sa ikaduha nga bangka ang paglugdang sang ginasakyan sang mga biktima rason nga gilayon ang mga ini nagpangayo sang bulig agud marescue ang mga kaupdanan nga padulong kuntani sa kaadlawan sang isa nila ka abyan nga si Elnora Ganzon Decrito.
Sa karon, plano nga dal-on pabalik sa banwa sang Dumarao ang bangkay sang mga napatay nga sanday Nemarey Mendoza, Ronilo, Eildy kag Janna Parreño.
