Dakop sa ginkasa nga drug buybust operation ang kawatan kag manugtunto nga nagapangbiktima sa syudad sang Roxas sa Sitio Bagungon, Barangay Culasi, sining siyudad.
Ginkilala ang amo nga kawatan kay Jonathan Dela Cruz alyas “Tanya”.
Sa impormasyon nga nakuha sang Bombo Radyo ginpahayag nga sa ginpatigayon nga operasyon nabakal kay alyas “Tanya” ang isa ka sachet sang ginapatihan shabu kag dugang sini nga nakuha sa paghinakop sang amo nga kawatan ang tatlo tanan ka plastic sachets sang ginapatihan shabu, kag P5,000 nga marked money.
Narekober tanan kay Tanya ang 20 ka gramos sang shabu nga may standard drug price nga Php 136,000.00.
Magapanagtubang naman sa sampaw-sampaw nga kaso si alyas Tanya kalakip na ang asud-asod nga kinawatay nga nagakahinabo sa syudad sang Roxas nga ginapatihan siya ang may kahimuan kasubong man ang nagakalain-lain nga pagpanunto.
Sa karun, yara na ini sa paghinakop sang mga kapulisan para sa nagakaigo nga disposisyon.
