ROXAS CITY – Madinalag-on nga nadakpan ang ginapahayag nagapangawat sang mga isda sa fishpen sa Sitio Cablat-an, Barangay Cagay, Roxas City.
Sa interview sang Bombo Radyo kay Punong Barangay Arturo Aragon sang nasambit nga barangay, ginkilala ang suspek kay
Edwin De Lantar 34-anyos kag residente sang Sitio Bagongon, Barangay Culasi Roxas City.
Suno kay Aragon, malapit isa na ka tuig ang nagakatabo nga pagpangawat sa ila lugar rason nga madamo nga mga tag-iya sang fishpen ang nagpalab-ot na sang ila tagsa ka mga reklamo.
Apisar suno sa mga tag-iya nga sa ila mismo payag malapit sa ila pala-isdaan sila nagakatulog agud kun tani magbantay, madamo na nga beses sila napaslawan nga madakpan ang madugay na nga ginapahayag nagapangawat sang ila mga hinuptanan.
Apang sang damlag lang, dako ang ila pagpasalamat sang matigayon nga madakpan si De Lantar matapos nga mabatyagan sang isa sa mga tag-iya sang palaisdaan nga may yara sang naghulag nga makatilingala sa tubig kag sa iya pagtsekyar didto nakumpirmar nga akto nga nagapatigayon sang pagpangawat ang amu nga suspetsado.
Mahibaluan, yara sa kapin 30 ka mga indibidwal ang nagbululigay
nga pangitaon ang kawatan agud matigayon ini nga madakpan.
Panugyan ni Aragon sa mga nagahimo sang indi maayo nga buluhaton, untatan na kag maayo nga magsugod sang pagpangabuhi nagikan sa gintimakasan bangud tubtob sa ulihi wala ini sang may maayo nga epekto kag resulta.
