ROXAS CITY – Nagpabalhag sa Roxas City Police Station ang isa ka 26-anyos nga lalaki matapos nga ginaalegar ginkawat ang duha ka mga inugbulang nga manok sa New Road, Barangay Banica, Roxas City.
Ginkilala ang tagreklamo nga si Matthew Jaro sang nasambit nga lugar.
Sandig sa ginpabalhag sang tagreklamo sa pulisya nga masabod na ini kuntani sang iya napulo ka manok sang natalupangdan na lamang sini nga kulang na sang duha ang iya manok.
Nagduda na ini nga posible ginkawat ang iya duha ka manok rason nga gintsekyar sini ang CCTV footage sang kaingud nila nga balay kag didto nakita ang tatlo ka wala matumod nga mga kawatan nga nagtaban sang iya mga manok.
Bangud diri, ginpakamaayo na lamang sang tagreklamo nga iparekord sa pulisya ang natabo.
Samtang, padayon naman nga ginatumod sang mga kapulisan ang nasambit nga mga kawatan nga responsable sa insidente.
