ROXAS CITY – Gintambungan sang nanari-sari nga mga stakeholders kag magkatuhay nga mga ahensiya sang gobyerno ang ginpatigayon nga kick-off ceremony ukon opisyal nga pagbukas sang Brigada Eskwela 2019 sa probinsiya sang Capiz.
Ini ang ginpahayag ni Department of Education (DepEd) Capiz Schools Division Superintendent Dr. Roel Bermejo sang mainterview sang Bombo Radyo Roxas.
Ang opisyal nga pagbukas sang amo nga aktibidad ginpatigayon sa Ivisan Elementary School sa banwa sang Ivisan nga may tema ‘Matatag na Bayan Para sa Maunlad na Paaralan’.
Suno kay Dr. Bermejo, napili ang amo nga buluthuan nga mangin venue sang kick-off ceremony sang week-long Brigada Eskwela bangud isa ini sa mga best implementing school sang Brigada Eskwela sa probinsiya sang Capiz.
Mahibaluan nga kapin sa 471 tanan ka mga manunudlo gikan sa magkatuhay nga mga elementary kag secondary public schools sa probinsiya ang nagtambong sa amo nga aktibidad.
Magluwas diri, nakit-an man ang presensiya sang mga stakeholders, local officials kag mga ginikanan nga nagtib-ong para kawsa sang DepEd.
Mahibaluan nga mayor nga katuyuan sang nasambit nga aktibidad amo ang mapreparar na ang mga hulot-klasehan sa magkatuhay nga mga eskwelahan sa probinsiya antes pa man magbukas ang klase.
