Ginpatigayon subong nga adlaw ang kick-off program sang Brigada Eskwela sa Banica Elementary School sa Roxas City bilang kabahin sang pagpanghanda para sa pagbukas sang school year 2026-2027.
Sa interview sang Bombo Radyo kay Rexieme Aurella, Principal III sang amo nga buluthuan, iya ginpahayag nga ginpartisiparan ang aktibidad sang nagkalain-lain nga stakeholders, lakip na ang mga ginikanan, mga manunudlo kag iban pa nga mga partner sang eskwelahan.
Suno kay Aurella, pinaagi sa amo nga programa, ginalauman nga mangin handa ang mga hulot-klasehan kag iban pa nga pasilidad sa pagbalik sang klase.
Nagpasalamat man ang administrasyon sang eskwelahan sa tanan nga nagbulig kag nagpakigbahin sa Brigada Eskwela agud mangin mas maayo ang kahimtangan sang buluthuan para sa mga estudyante.
