Preparado na ang Kilusang Bayan Kontra Kurakot sa hublag-protesta nga pagahiwaton kadungan sang pagsugod subong nga adlaw sang impeachment trial batok kay Vice President Sara Duterte.
Sa interview sang Bombo Radyo kay David Michael San Juan, convener sang Taumbayan Ayaw sa Magnanakaw sa Abusado Network Alliance (TAMA NA), iya ginpahayag nga magatipon ang nagkalain-lain nga grupo sa atubang sang Film Center malapit sa senado matapos ang pagdumili sang anuman nga sahi sang hublag-protesta sa atubang mismo sang senado.
Suno kay San Juan, ang ila grupo ang magapatigayon sang programa samtang nagamonitor sa dalagan sang impeachment trial.
Pahayag pa niya, nagalaum ang ila grupo nga personal nga maga-atubang si Vice President Sara Duterte sa una nga adlaw sang trial, base sa iya nauna nga pahayag nga magatambong lamang ini kun ang Senado na ang maga-uyat sang kaso.
Dugang pa sang natungdan, ginalauman nila nga matuman sang Senate Impeachment Court ang ila papel sa patas kag matawhay nga trial sa kaso, bilang sabat sa madugay na nga panawagan sang publiko para sa transparency kag accountability sang mga opisyal sang gobyerno.
