Opisyal na nga ginpangunahan sang lider sang North Korea nga si Kim Jong Un ang pagbukas sang Wonsan Kalma coastal tourist area, isa ka dako nga resort nga maka-akomodar sang 20,000 ka mga turista.
Suno sa report sang KCNA, nagpabutyag sang pagkakontento si Kim sa proyekto kag nagsiling nga magapadayon ang madasig nga pag-uswag kag iban pa nga dalagku nga tourist zones sa iya pungsod.
Ang Wonsan, nga anay destinasyon sang mga lokal, ginapahayag nga ginapasangkad agud mangin isa ka milyon-dolyar nga hotspot sang mga turista. Bisan pa nga ang turismo isa ka importante nga ginakuhaan sang kita para sa North Korea, wala pa ini makaganyat sang isa ka mayor nga dumuluong nga kaupod bangod sang mga sanksyon gikan sa Nasyones Unidas.
Ang tourist area magabukas sa mga lokal sugod sa Hulyo 1, apang wala ginsambit sang KCNA ang mga dumuluong nga turista.
Ginpahaganhagan man sang pungsod ang mga pagdumili sa pagsulod sang mga turista halin sang 2023, kag ang mga grupo gikan sa Russia ginpahanugutan nga magsulod sa pungsod.
Madumduman nga labi nga ginpabaskog sang Russia kag North Korea ang ila kaangtanan sa isa kag isa, nga magalakip sang pagbisita sang Russian ambassador sa Pyongyang bilang special guest sa amo nga seremonya.
