ROXAS CITY – May lamud-pamulitika na ang malapnagon sa karon nga kinagamo kag hublag-protesta sa Estados Unidos.
Sa iya nga report sa Bombo Radyo Roxas, ginpahayag ni Bombo International Correspondent Raffy Fernando nga may mga demonstrador sa pila ka siyudad kag estado sa Amerika nga may personal na nga kaakig sa mga local officials rason nga nagaupod sila sa mga protesta.
Posible man suno diri nga may tagsa-tagsa nga ginadampigan nga pulitiko ang pila ka demonstrador ilabi pa nga election period sa karon sa pungsod.
Posible man suno diri madugangan ang numero sang mga estado nga magapatuman sang curfew kun padayon nga mangin malapnagon ang mga hublag-protesta.
Gindugang pa sini nga posible nga magsaka ang kaso sang mga krimen sa Amerika ilabi na nga naga-bayolente na karon ang pila ka demonstrador.
Mahibaluan nga masobra sa 100 na ang naaresto sang mga otoridad sa Amerika bangud madamo nga mga edipisyo kag iban pa nga government properties na ang ginsunog kag ginsulod sang mga nagaprotesta.
Ang nasambit nga kinagamo ang kasunod sang pagkapatay sang isa ka black American nga si George Floyd matapos ginludhan sang pulis ang liog sini sang ini ang gin-aresto bangud sa kaso nga forgery.
Gilayon naman nga ginkakas sa pwesto ang apat ka mga pulis nga may kahilabtanan sa nasambit nga insidente.
